الله أكبر الله أكبر .. أذان الظهر
يا رب يا رب .. بحق ده الادان تنجح يا (....) يا إبن إبني تنجح وأشوفك دكتور قد الدنيا
(....) يا ستي بس انا في كليه التجاره
وماله يا ابني هو يكتر علي ربنا ؟ .. ده ربنا قادر علي كل شئ
(....) يا ستي ونعم بالله بس اللي بيطلع دكتور لازم يكون في كليه الطب مش التجاره
يالا تجاره تجاره ..ومالها التجاره .. دي حتي التجاره شطاره .. ده جدك الله يرحمه كان تاجر في الوكاله قد الدنيا
(....) يا ستي التجاره اللي في الوكاله حاجه واللي في الكليه حاجه تانيه خالص
علي العموم شد إنتا حيلك وأنا أخلي جدك ياخدك معاه الوكاله عشان تتدردح وتفهم السوق ماشي ازاي
(....) جدي إيه اللي هياخدني معاه ... ده جدي مات من زمان يا ستي
يا مصيبتي عبد الواحد مات .. يا حبيبي يا اخويا .. مكنش يومك يا سبعي
(....) يا ستي ده ميت من 30 سنه
تلاتين سنه ياااااااه ده العمر بيجري يا ولاد .. تصدق ولا حسيت بيهم .. يالا أهو غاار في داهيه .. قطع وقطعت سيرته ده كان بخل الدنيا فيه .. إن عمره ما دخل عليا بفراخ ولا لحمه
(....) يا ستي حرام عليكي عايز اذاكر بقي
يوووه وانا مسكاك يا ولا متذاكر .. ذاكر عشان ربنا يكرمك وتاخد الدبلون
(....) دبلون ايه يا ستي .. اسمه البكالوريوس
انتا عتضحك عليا يا وله ..اسمه الدبلون الواد ابن فايزه جدع كده زيك في مدرسه التجاره وخد الدبلون
(....) خلاااص دبلون دبلون يا ستي سيبيني بقي عشان اذاكر
ذاكر .. ذاكر ياخويا ذاكر .. تعرف يا واد ندرن عليا يوم ما تنجح لاكون خطبالك البت عبير بت رئيسه .. دي ايه يا ولا اخلاق وعلام وادب
(....) يا ستي عبير دي معاها اعداديه
وماله يا ابني الراجل ميعبهوش الا جيبه
(....) يا ستي راجل ميييين . عبير دي بنت
عبير .. عبير دي مين يا ولا انتا بتعرف بنات من ورانا ولا ايه
(....) لا اله الا الله .. ابوس رجلك يا ستي ارحميني بقي
طب ذاكر ذاكر جتك نيله وانتا طالع براوي كده زي امك .. قطعت وقطعت سيرتها ..انا مش عارفه ابوك كان اتجوزها علي ايه ..حكم .. قال لبس البوصه تبقي عروسه .. بس والنبي لاكون مبوظه الخطوبه دي ومجوزاه انيسه بت اختي
(....) يا ستي خطوبه اييييه ابويا متجوز امي من عشرين سنه .. وبعدين انيسه دي بنت اخوكي مش بنت اختك .. واساسا انتي ملكيش اخوات بنات
صحيح يا وله انتا عندك حق انا معنديش اخوات بنات .. اصل انا امي مكنتش بتخلف صبيان كانت كل ما تجيب واد يموتلها
(....) حرااااااااااام .. ستي متطلعي البلكونه شويه تشميلك حبه هوا
لا يا اخويا ..ده في واد حليوه في البلكونه اللي قصادنا حلو كده وشعره مسبسب بيقعد يعاكسني
(....) خلاص روحي المطبخ زمان امي خلصت الرز روحي كليه
رز .. رز ايه يا ابني هو انا بقي ليا سنان للمكرونه .. اما اروح انام شويه
(....) يا ريت يا ستي
يا ريت ايه يا وله يا ابن ال(..) عايز تخلص مني
(....) يا ستي مش قصدي انا عايزك تريحي
(....) الحم لله خرجت وعرفت اذاكر
وتاني يوم في الامتحان حليت كويس .. لكن للاسف المراقب سحب مني الورقه قبل ما اكتب اهم حاجه فيها
انا اسمي كان اييييه .. اسمي كان اييييه .. يا تري انا ميييين